Giawhag ni PBBM ang ASEAN Plus Three nga palig-onon ang seguridad sa pagkaon, enerhiya, ug ekonomiya. Hibal-i ang mga importanteng lakang sa summit.

Gipasiugda ni Presidente Ferdinand Marcos Jr. atol sa ika-29 nga ASEAN Plus Three (APT) Summit ang panginahanglan sa pagpalig-on sa seguridad sa suplay sa pagkaon ug enerhiya, pagpadayon sa pamatigayon ug maritime logistics, ingon man sa mga mekanismo sa pinansyal nga makatabang sa mga nasud panahon sa krisis.

Matud ni Marcos, mahinungdanon ang mga kasamtangang mekanismo sama sa Chiang Mai Initiative Multilateralisation (CMIM) ug ASEAN Plus Three Emergency Rice Reserve (APTERR) sa pagpabilin sa kalig-on sa ekonomiya ug pagsiguro sa suplay sa bugas panahon sa emerhensiya.

Dugang pa niya, gikinahanglan ang hiniusang paningkamot sa mga nasud aron masiguro ang kasaligan nga suplay sa pagkaon ug enerhiya, mapadayon ang kaluwasan ug pagkaabli sa mga ruta sa pamatigayon, ug malikayan ang paghunong sa mga kalihokan sa negosyo taliwala sa mga panagbangi, pagkabalda sa supply chain ug mga kalamidad.

Giawhag usab ni Marcos ang mga lider nga siguruhong mabati sa ilang mga katawhan ang konkretong benepisyo sa hapit tulo ka dekada nang kooperasyon sa ASEAN Plus Three, nga magtimaan sa ika-30 nga anibersaryo niini sa 2027. (raniel mahunyag)