Gisaway ni Akbayan Party-list Representative Perci Cendaña ang grabeng impluwensya sa mga political dynasty tungod sa nahitabong lahugay sa liderato sa Senado.
Gitandi sa kongresista ngadto sa usa ka “teleserye” ang nahitabo, diin nag-ilog lang matod pa sa gahom ang mga dagkong pamilya sa politika.
Tungod niini, nausik lang ang oras sa personal nga interes imbes nga tutokan ang mga balaod nga mas gikinahanglan karon sa mga Pilipino.
Nagpasidaan si Cendaña nga delikado alang sa demokrasya kung ang dagan sa gobyerno magdepende lang sa iilang iladong apelyido.
Sa katapusan, nanawagan siya nga usbon na kini nga sistema aron mahatagan og prayoridad ang tinuod nga kaayohan sa katawhan. (jane abulag)
