(Update) CAGAYAN DE ORO CITY – Misaka pa sa unom ka tawo ang namatay sa panagbangga sa Kia Bongo ug Fuzo Cargo truck diha sa national highway sa Zone 2, Brgy. Agusan ning syudad.
Kini ang gikompirmar ni Police Corporal Rodulfo Abaday, traffic investigator sa Puerto Police Station atol sa pakighinabi sa Bombo Radyo.
Miingon si Abaday nga nakabsan sa kinabuhi ang usa ka babaye nga kabahin sa 16 ka biktimang naangol nga gidala sa Northern Mindanao Medical Center.
Apil sa mga namatay ang driver sa Kia Bongo nga si Alvin Escabalte, 43 anyos, minyo ingon man ang 76-anyos nga si Vernon Banuag nga taga Tagoloan, Misamis Oriental.
Gikan mitambong ug lubong sa Zamboanga del Sur ang mga biktima nga sakay sa Kia Bongo ug pauli na sa Tagoloan sa dihang nahitabo ang ngilngig nga aksidente.
Hinoon, wala maunsa ang driver sa Fuzo truck nga kargado sa mga buhing manok nga nailang si Julieto Telen nga taga Brgy. Tablon, kinsa gilayong mitahan sa kwerpo sa kapolisan.
Namahayag si Abaday nga nagpadayon pa ang iyang imbestigasyon aron masuta kon kinsa sa duha ka driver ang sad-an sa maong hitabo.
Samtang gipamugos ni Telen nga dili siya sad-an sa panagbangga tali sa Kia Bongo nga gimaneho ni Escabalte.
Sa pakighinabi sa Bombo Radyo, gibutyag ni Jabagat nga mikawat sa iyang linya ang Kia Bongo nga hinungdan sa panagbangga.
Gi-asoy pa niini nga naningkamot siya maka-preno apan wala na kini ma-apas tungod sa kusog nga dagan sa Kia Bongo.
Samtang gibutyag ni Abaday nga kon walay mahitabong ‘amicable settlement’, ilang ipasaka batok kang Telen ang kasong reckless imprudence resulting to multiple homicide, multiple serious physical injuries ug damage to property.
