Girekomendar sa Field Investigation Bureau sa Ombudsman ang pagsang-at sa kasong plunder ug indirect bribery batok ni Senador Rodante Marcoleta human kuno siya nakadawat sa ₱75 milyon isip campaign donations niadtong miaging tuig.
Base sa complaint-affidavit nga gipirmahan niadtong Mayo 18, giduso sa mga imbestigador nga kasohan si Marcoleta sa plunder kauban si kanhi Quezon City 2nd District Rep. Mike Defensor ug duha pa ka indibidwal nga naghatag sa maong donasyon sa senador.
Ang rekomendasyon kabahin sa mas lapad nga imbestigasyon sa Ombudsman bahin sa paggamit sa campaign funds ug posibleng paglapas sa balaod batok sa korapsyon.
Sa pagkakaron, wala pa’y pahayag gikan sa kampo ni Marcoleta ug sa uban pang nalakip nga indibidwal.
Ang kaso nga plunder usa sa labing bug-at nga krimen ilawom sa balaod, nga adunay silot nga tibook kinabuhi nga pagkabilanggo kon mapamatud-an nga sad-an.
Wala kini’y gitakdang piyansa alang sa temporaryong kagawasan.
Samtang ang bribery nagpasabot sa ilegal nga pagdawat sa pabor o kwarta kapalit sa impluwensiya o gahum.
