Nagpahigayon og special payout ang DSWD sa Taguig alang sa mga TNC drivers ug riders aron mapaspas ang pagpang-apod-apod sa ayuda ubos sa Cash Relief Assistance program, apan sumala ni Secretary Rex Gatchalian, nagpabiling hagit ang pag-abot sa gatosan ka libo pa ka mga drivers nga wala pa makadawat sa ilang ₱5,000 nga hinabang.
Gibutyag sa kalihim nga dako ang nahimong problema sa sayop nga impormasyon sa database ug kakuwang sa koordinasyon sa pipila ka transport companies, hinungdan nga nagbutang sila og mga Help Desk sa payout sites aron daling ma-beripika ang mga pangalan ug matul-id ang bisan unsang sayop sa listahan.
Tungod niini, giawhag sa DSWD ang tanang mga driver nga siguruon nga kompleto ang ilang dokumento aron hapsay ug paspas ang ilang pagdawat sa maong hinabang. (Jane Abulag)
