CAGAYAN DE ORO CITY- Nabahin karon ang mga kongresista gikan dinhi sa rehiyon kabahin sa ilang pagbotar sa kontrobersyal nga balaodnon sa dealth penalty sa kongreso kagabii.
Kini human pasado na sa ikatulo ug katapusang pagbasa ang House Bill 4727 o death penalty bill diin gitumong sa Duterte administratio nga subli ipatuman sa nasud.
Gibutyag ni Iligan City Lone District Rep Frederick Siao nga subay sa nakuha niya nga listahan,bugtong sila si Bukidnon 1st District Rep Maria Lourdes Acosta;Bukidnon 2nd District Rep Florencio Flores Jr ug Bukidnon 3rd District Rep Manuel Zubiri ang kusganong misupak sa maong balaodnon.
Si Siao miingon nga kuyog niya nga miuyon sa pagpasar sa death penalty bill sila si Cagayan de Oro 1st District Rep Rolando ‘Klarex’ Uy;Cagayan de Oro 2nd District Maxi Rodriguez Jr;Misamis Oriental 1st District Rep Peter Unabia ug Misamis Oriental 2nd District Rep Juliette Uy.
Samtang uyon usab si Misamis Occidental 1st District Rep Jorge Almonte ug Misamis Oriental 2nd District Rep Henry Oaminal;Lanao del Norte 1st District Rep Mohamad Khalid Dimaporo ug Lanao del Norte 2nd District Rep Abdullah Dimaporo;Camiguin Lone District Rep Xavier Jesus Romualdo ug Bukidnon 4th District Rep Rogelio Neil Roque.
Namugos si Siao nga ang personal niya nga pagbotar sa subli pagpatuman sa death penalty ang nagtumong pagpitol sa mga tawo nga nalambigit sa illegal drug trade dinhi sa nasud.
