CAGAYAN DE ORO CITY – Gi-depensaan ug gipamugos sa liderato sa Cagayan de Oro City Police Office o COCPO nga dili makapa-alarma ug wala usab nagsaka ang kreminalidad nga sunod-sunod nga natigayon sa dakbayan.
Kini maoy gitubag ni COCPO deputy for operations Lt Col Surki Sereñas ngadto sa mga pagsaway sa katawhan nga giagi sa social media.
Miingon ang opisyal tinood nga dunay high-publicized crimes nga natigayon sa dakbayan apan walay pagsaka sa kremin.
Namugos si Sereñas nga nagbaton lamang sa napulo ka crime incidents kada-semana ang gakatigayon sa syudad diin mas ubos walo ka crime incidents kada-semana itandi sa ubang highly urbanized cities sa nasud.
Giklaro usab sa COCPO nga walay naglihok nga serial killers ug serial rapists sa syudad kay dili man konektado ang pipila ka hitabo sulod ning bulana.
Sa Hulyo ning tuiga,pipila ka dagkong hitabo ang natigayon sa syudad ang naglakip sa pagpatay sa magsisibya sa radyo nga si Federico ‘Ding’ Gempesaw,upat ka pagpanunggab-patay sa mga biktima sa magkalahing higayon,pagtulis sa gasoline station ug bodega sa bugasan ug ang duha ka karambola sa sulod sa night bars nga naglakip sa pagka-pusili-patay sa market vendor nga taga-Opol,Misamis Oriental sa Corrales Avenue ning syudad sa miaging kadlawon sa Sabado.
Samtang mismo si Police Regional Office 10 Director Brig Gen Benjamin Acorda Jr ang mibati’g kaalarma sa sunod-sunod nga dagkong hitabo sa syudad sulod sa Hulyo ning tuiga.
Kini ang rason nga nangunay ang heneral sa pagsusi sa pipila ka crime incidents gikan sa mismong pagpatawag niini kang City Police Director Col Aaron Mandia.
Gibutyag ni PRO 10 spokesperson Lt Col Michelle Olaivar nga tinood nga dako ang pag-ubos sa crime rate incidents sa syudad sa Enero hangtod Hunyo ning tuiga, apan wala pa nalakip niini ang mga hitabo mismo ning bulana.
