CAGAYAN DE ORO CITY – Giandam na ang kasong murder nga ipasaka sa kapolisan batok sa 34 anyos nga construction helper nga miunay pagpatay sa kauban niini nga panday sa Purok 4,Brgy Calamcam,Talisayan,Misamis Oriental.
Giila ni Talisayan Police Station commander Maj Arnold Gaabucayan ang biktima nga si Paterno Opeso,61 anyos,minyo samtang ang suspek mao si Junun Cariño nga managsilingan sa lugar.
Gibutyag ni Gaabucayan nga unang nagkalalis ang duruha samtang nag-inom apan wala damha miuli si Cariño aron mokuha’g hait nga hinagiban diin unang gidunggab ang biktima ayha giputla’g ulo.
Gipangita na sa kapolisan ang nagtagu-tago nga suspek aron manubag sa salaod nga nahimo niini.
