CAGAYAN DE ORO CITY-Ipabungkag sa public utility committee ang gisudlang kontrata tali Cagayan de Oro Water District o COWD ug MetroPac Water Investments Corporation.
Kini human nadiskobre nga mas mahal ug baligya sa tubig ang maong kompanya sa COWD itandi sa Rio Verde Consortium.
Nadiskobre nila ni Kag Bong Lao kinsa chairman sa komitiba nga 16 pesos per cubic meter ang baligya sa MetroPac sa COWD itandi sa dul-ag 11 pesos sa Rio Verde atol sa hearing sa konseho.
Samtang gilayong gi- depensa sa kadagkuan sa COWD ang pagkuha nila sa serbisyo sa MetroPac Water Investments Corporation bisan mahal ang presyo sa tubig nga ilang ibaligya.
Gibutyag ni COWD chairman Eduardo Montalvan nga kumbinsido sila nga may kapas ang MetroPac nga maka-suplay sa igong tubig sa dili mominus 700-mil ka konsumante sa syudad.
Una nang gimando sa Commission on Audit sa COWD nga i-terminate ang ilang kontrata sa Rio Verde tungod kay ilegal ang pagkahimo niini.
Dumduman nga nasentro sa pag-utingkay kabahin sa gisudlan sa COWD nga kontrata sa MetroPac Water Investments Corporation ang subli pagpatawag sa konseho kagahapong adlawa.
Kini inay gisahon nila ni Lao ang Rio Verde tungod sa dugay nga pagtul-id sa ilang mga nangliki nga mga tubo sa tubig sa miaging semana.
Gibutyag ni Engr. Jeofrey Hapitan,vice president for operations nga nasentro ang topiko sa gipatawag nga sesyon sa giselyohan nga “joint venture” sa COWD tali na sa MetroPac isip hulip kanila.
Ubos sa MetroPac,magbayad ang matag- konsumante sa water rate nga P16 inay P10 nga singil sa tubig gikan sa Rio Verde.
Una usab niini,gisaad ni Hapitan nga mabalik na sa normal ang ilang pagsuplay sa tubig sa Oktubre 16 ning tuiga ning syudad.
