Gipadayag sa Cagayan de Oro Water District (COWD) ang padayon nga pagpangandam aron matubag ang posibleng epekto sa El Niño sa suplay sa tubig sa syudad.
Namahayag si Dr. Gerry Caño, Board Chairman sa COWD, sa Bombo Radyo nga adunay na silang gitukod nga komitiba nga motutok sa mga panginahanglan sa mga apektadong lugar, ilabi na sa mga komunidad nga direktang maapektuhan sa kainit sa panahon.
Dugang pa niya, base sa mga miaging kasinatian sa El Niño nga gi‑deklarar sa PAGASA, wala pa nila naobserbahan nga moubos sa kritikal nga lebel ang water supply kung maayong mapadagan ang sistema sa operasyon.
Bisan pa niini, giila ni Caño nga importante gihapon ang padayon nga pag‑monitor sa tubig aron malikayan ang posibleng kakulang sa umaabot nga mga bulan.
Gipasalig sa COWD nga magpabilin ang koordinasyon ug pagpangandam aron masiguro ang lig‑on nga suplay sa tubig sa tibuok Cagayan de Oro.
