(Update) CAGAYAN DE ORO CITY – Nakakuha pa’g pagdayeg gikan kang City Mayor Klarex Uy ang kapolisan bisan kon gitawag sila nga ‘lousy’ sa konseho.
Kini tungod sa dugay nga pagduso’g kaso batok sa batan-ong Stephen Neri kinsa suspek pagligis-patay sa gikabangi niini nga laing batan-on ug gikaangol sa tulo pa niini ka kauban sa tulay sa Sitio Taguanao,Brgy Indahag ning syudad sa miaging semana.
Maoy gi-basehan sa mayor ang paspas nga pagtumbok sa mga pulis kon kinsa ang suspek nga maoy gitudlo nga miligas-patay sa biktima nga si Paul John Levita ingon man pagkaangol nila ni Rufus Levita,Prince Lopez ug Jhane Valerie Canonero nga nanimuyo ning syudad.
Dugtong niini,miapelar ang mayor kang Neri nga dili na idako ug ipabug-at ang iyang salaod hinungdang angay na kining motahan sa sabakan sa balaod.
Samtang nakasuhan na sa murder ug frustrated murder ang batan-ong suspek nga miligis-patay sa gikabangi niini sa inom sa Sitio Taguanao,Brgy Indahag ning syudad.
Miingon si Cogon Police Station commander Maj Julius Saluta nga ma-konsiderar nga ‘case cleared’ na ang hitabo kay nakasuhan na nila ug sa pamilyang Levita ang suspek nga gitumbok sa mga testigo nga miligis-patay sa biktima ug laing tulo ang samaron.
Siya miingon nga wala nila igsapayan nga gitawag sila’g ‘lousy’ sa konseho sa dakbayan kay maoy importante kanila nga maduso sa regular filing ang kaso sa piskalya batok suspek.
