CAGAYAN DE ORO CITY – Gimando ni City Police Dir. Col. Aaron Mandia sa tanang special units sa Cagayan de Oro City Police Office o COCPO ang pag-gukod sa mga suspek nga mitulis sa Steezy Gadget Hub nga nahimutang diha sa Corrales-Dolores Sts. ning syudad kagahapong adlawa.
Dili mominus sa upat ka milyon ka pesos nga balor sa electronic gadgets ang nakuha sa tulo ka tulisan nga naka-helmet ug armado sa wala matinong kalibre sa mga armas gikan sa maong establisemento.
Apil sa nadala sa mga tulisan ang iphone 14 Pro Max, iphone 14 Pro, Iphone 14, iphone 13, Macbook Air, Macbook Pro M2, ipad Pro M2, ipad Pro M2, ipad Mini, ipad 10th Gen, ipad 9th Gen, Z Fold 4, Z Fold 3, Z flip 3, Z Flip 4 S22 Ultra, S22 Plus ug S22 cellphones.
Gilayong misibat ang mga suspek sakay sa usa ka XRM motorcycle padulong sa wala matinong direksiyon.
Samtang mi-apelar si Mandia sa tag-iya sa mga balay patigayon nga dili mokompiyansa ug magmabinantayon tungod sa pagsi-aw sa mga dautang elemento alayon sa nagkaduol nga pasko ug pagsugat sa bag-ong tuig.
