CAGAYAN DE ORO CITY – Giimbestigaran sa kapolisan ang motibo sa pagpusil-patay sa usa ka lalaki diha sa Sitio Talisay, Brgy. Bauk-Bauk, Balingoan, Misamis Oriental.
Naila ang biktima nga si Arnel Dumagat Sacal Jr, 25-anyos, minyo nga taga-NHA, Benoni, Camiguin province.
Si Sacal ang kanhi security escort ni Atty Homer Mabale nga midagan pagka-kongresista sa lone district sa Camiguin sa Mayo 9 ning tuig.
Nag-videoke ug nag-inom ang biktima kauban ang iyang mga higala sa dihang gipusil kini sa wala mailang suspek gamit ang 45 kalibreng armas.
Naka-angkon kini sa samad-pinusilan sa likod nga maoy hinungdan sa iyang kamatayon.
Nadala pa sa Talisayan Provincial Hospital ang biktima apan gideklarar kini sa mga doktor nga dead on arrival.
Samtang wala pa’y giluwatang pahayag si Mabale atubangan sa publiko kabahin sa kamatayon sa iyang kanhi kaabag sa miaging piliay sa probinsya.
