Nanawagan si Senador Risa Hontiveros sa iyang mga kaubanan nga balikan na ang tinuod nga buluhaton alang sa katawhan, dungan sa pagsulod sa kataposang semana sa sesyon sa Senado sa dili pa ang ilang pagtakop.
Matod sa senador, upat ka semana na silang nausik sa mga lalis sa hawanan nga pulos personal ug walay kalabotan sa kaayohan sa publiko.
Gihangyo niya nga paspasan na ang pag-atiman sa mga nag-unang balaodnon, mga imbestigasyon, ug ang pagpangandam alang sa debate sa panudlanan sa nasod.
Kinahanglan na usab nga ipadayon sa labing daling panahon ang naudlong nga impeachment trial aron mahatagan na kini og katin-awan.
Labaw nga gikinahanglan ang dinalian nga aksyon sa kagamhanan tungod sa nagkagrabe nga epekto sa nasod sa nagpadayong gubat sa Middle East ug sa krisis sa petrolyo. (jane abulag)
