Gipakusgan karon sa House prosecution panel ang ilang kampanya sa impormasyon aron mas mapaklaro ngadto sa publiko, ilabi na sa kabatan-on, ang dagan sa constitutional process kalabot sa impeachment sa nasod.
Sumala ni Representante Renee Co, gihimo ang maong lakang pinaagi sa mga fora ug interbyu aron ipasabot ang unod sa Articles of Impeachment nga nagsilbing accountability measure alang sa mga tag-as nga opisyal sa kagamhanan.
Giangkon ni Co nga duna nay limitasyon ang pwedeng ikasulti sa mga sakop sa prosecution panel tungod kay kasamtangan na kining giatubang ug anaa na sa hawanan sa Senado.
Bisan pa man niini, gipasalig sa magbabalaod nga magpadayon ang ilang tahas sa pagpasabot sa kinatibuk-ang legal nga proseso aron magpabiling kahibalo ug magiyahan ang katawhan.
Kahinumduman nga ang impeachment mao ang nag-unang mekanismo sa balaod aron sutaon ug tangtangon sa katungdanan ang mga opisyal nga mapatubang sa seryosong pagsupak sa batakang balaod. (jane abulag)
