Gisugdan na ang lawom nga imbestigasyon sa nahitabong pagkahugno sa usa ka 9-storey building didto sa Angeles City, Pampanga.
Aron masiguro nga patas ug kasaligan ang resulta, mikuha og mga pribadong imbestigador ang kagamhanang lokal aron motabang sa pagsusi.
Gibutyag ni Mayor Carmelo Lazatin Jr. nga gusto nilang matugkad ang tinuod nga rason sa trahedya ug mapanubag ang tag-iya ug kontraktor sa palpak nga proyekto.
Bisan pa man nga misaad ang mga responsable nga mokooperar ug dili manago, uyon ang alkalde nga mapahamtangan sila sa Hold Departure Order.
Gihimo kini aron masigurong dili sila makagawas sa nasod samtang padayon pa ang tibuok nga pagsisiyasat sa maong insidente. (jane abulag)
