Gisupak sa Geopolitical Expert ug Philippine BRICS Strategic Studies – think tank nga si Professor Herman “Ka Mentong” Laurel ang tanan impormasyon nga gipagawas ni Department of National Defense (DND) Secretary Gilberto Teodoro kalabot sa pag-ronda sa Sanjia Steel Corporation nga nahimutang sulod sa Philippine Veterans Investment Development Corporation o mas naila karon isip PHIVIDEC Industrial Authority.
Namahayag si Ka Mentong nga tataw kining pagpanikas sa mga trabahenteng pinoy ug pagpanghadlok sa mga foreign investors sa Pilipinas, bisan legal ang gihawiran nga mga dokumento sama sa mga Chinese Nationals nga nanag-iya niini, ug wala nay labot sa kompanya si Tony Yang.
Miingon ang eksperto nga sayop ang mga gipagawas nga impormasyon ni Teodoro batok Sanjia kay nasayud na daan ang mga investors nga laraw patukuran sa DND ang tibook industrial complex sa dugang base sa pwersang militar ug posibleng gamiton isip base militar sa Estadu Unidos.
Subay sa pagtoon, namugos si Laurel nga lehitimo ang negosyo nga nakarehistro ug nag-operate sulod sa industrial estate, ug gitukod kini alang sa ekonomikanhong kalamboan.
Ang pag-ronda, pagpasangil ug pagpanghulga makadaot sa imahe sa mga foreign investors ug makapugong sa dugang pamuhunan sa Mindanao. Sa panan-aw ni Laurel, kini nga naratibo usa ka taktika aron ipangatarungan ang dugang nga military cooperation sa US ug pagpalig-on sa geopolitical influence niini sa nasud
