Nagatoo si Cathy Estavillo, spokesperson sa Bantay Bigas, nga ang grabe nga pagka-import dependent sa Pilipinas maoy usa sa nagpalala sa taas nga presyo sa mga palaliton ug sa kahimtang sa ekonomiya sa nasod.
Matod niya, nagkadaghan ang mga Overseas Filipino Workers nga mobalik sa Pilipinas tungod sa kagubot sa Middle East, nga midugang pa sa problema sa kakulang sa trabaho sa nasod.
Dugang pa niya, tungod kay konsumer-based ang ekonomiya sa nasud, halos tanang gikinahanglan gina-import, maong dali kaayo maapektuhan sa global nga pagsaka sa presyo sa lana.
Gipunting usab ni Estavillo nga bisan pa og adunay rekurso sa lana ang Pilipinas, dili gihapon kini mapahimuslan sa katawhan tungod sa kontrol sa langyaw nga mga investors sa proseso sa produksiyon.
Busa, gipasiugda sa Bantay Bigas ang panginahanglan sa pagpalig-on sa lokal nga produksyon aron maminusan ang pagsalig sa import ug maprotektahan ang ekonomiya sa nasod.
