Gisaway sa Malacañang nga hilabihan ka “premature” ug walay pagtahod sa buhatan sa Bise Presidente ang paghisgot na sa mga posibleng mopuli kang Vice President Sara Duterte samtang wala pa mag-abli ang impeachment trial sa Senado.
Gipamatud-an ni Presidential Communications Office Spokesperson Atty. Claire Castro nga kinahanglang patigbabawon ang due process ug pasagdan nga moligid ang husto nga legal nga proseso.
Gipanawagan usab sa opisyal nga dili angay magdikta o mag-una-una ang pikas bahin sa mahimong dagan sa kaso sa mga senador.
Kabahin sa pamahayag ni Senator Alan Peter Cayetano, gipatin-aw sa Palasyo nga walay si bisan kinsa ang may katungod nga manguna o magdikta sa mahimong desisyon sa Punong Ehekutibo.
