CAGAYAN DE ORO CITY – Gitin-aw sa kapolisan nga walay deperinsiya sa pangisip ang mag-uuma nga mitigbas-patay sa iyang kaipon nga ‘mabdos’ diha sa Sitio Cabayabasan, Brgy. Poblacion, Sagay, Camiguin.
Sa pakighinabi sa Bombo Radyo, gibutyag ni Police Lt. Eugenio Lagmay Terte, officer-in-charge sa Sagay Municipal Police Station nga ang sobrang selos maoy nagtukmod kang Rodrigo Baguis sa pagpatay kang Karen Jamito, kinsa nagsabak sa upat ka bulan.
Giklaro usab ni Lt. Terte nga walay record sa kapolisan si Baguis ug wala kini nalambigit sa ginadiling droga.
Hisayrang naka-angkon sa duha ka tinigbasan sa iyang li-og si Karen nga maoy hinungdan sa iyang kamatayon. Nagpakamatay usab si Baguis pinaagi sa paghikot sa pisi sa iyang li-og.
