CAGAYAN DE ORO CITY – Patay ang magtiayon samtang lain upat ang samaron sa bangga tali pulos kargado nga prime mover ug wing van nga nag-resulta sa head-on collision sa Sayre highway, Sitio Damay, San Vicente, Sumilao,Bukidnon.
Giila ni Sumilao Police Station commander Lt Sunday Apan ang mga namatay nga si Roberto Labjata ug Veronica Labtaja nga taga-Poblacion,Tupi,South Cotabato samtang ang ilang samaron nga helper mao si Christian Garcia nga taga-Impasug-ong,Bukidnon.
Gibutyag ni Apan nga kasamtangang ubos sa medikasyon usab ang mga sakay sa wing van nga sila si Ralph John,Felix ug Vivian nga pulos nagbaton sa apelyido nga Diama nga taga-Davao region.
Gidali sa pagdala sa Sumilao Health Center ang mga sakay sa prime mover apan pulos na kini dead on arrival.
Sa inisyal nga imbestigasyon,nawad-an sa kontrol ang driver sa wing ban tungod sa kabug-at sa iyang karga nga scrap metals rason nga nakawat niini ang opposite lane ug nasugat ang prime mover.
Dugang ni Apan nga gipabantayan na niya sa iyang mga sakop ang driver sa wing van samtang ubos pa sa medikasyon sa provincial hospital sa Malaybalay City sugod kagahapon sa hapon.
