Gisaysay ni NBI Director Melvin Matibag ang usa ka eksplosibong alegasyon sa bribery nga naglambigit sa 18 ka ex-marines kinsa giingong gibayran aron lamang mopatim-aw sa publiko.
Base sa nakuhang statement sa NBI, gibutyag sa usa ka testigo nga adunay direktang transaksyon nga nahitabo diin dako nga kantidad sa kwarta ang gitanyag.
Prangkahang gipangalanan sa maong impormante si kanhi Congressman Mike Defensor nga mao matod pa ang nagtanyag sa 5-milyon ka piso aron makuha ang serbisyo sa maong grupo isip mga “testigo”.
Kini nga kantidad maoy gibayad aron maseguro ang pagpatingog sa maong mga personahe pinaagi sa usa ka press conference. Sa pagkakaron, padayon ang lawom nga imbestigasyon sa NBI aron sutaon ang tibuok kamatuoran luyo niining giingong “binayran” nga testimoniya.
Dugtong niini, gipasalig sa NBI nga ilahang nakuha ug narekord ang opisyal ug pirmadong pamahayag gikan sa maong indibidwal nga kasamtangang anaa sa ilang kustodiya.
Gilauman nga kini nga lig-on nga dokumento maoy magsilbing yawe sa ahensya aron tul-id nga masuta ang kamatuoran luyo niining dakong kontrobersiya. (Jane Abulag)
