CAGAYAN DE ORO CITY – Nakasuhan na sa illegal possession of firearms and ammunitions ang hardcore member sa Maute-ISIS terror group ug laing duha ka kauban sa gipatuman nga search warrant sa CIDG sa lungsod sa Marantao,Lanao del Sur.
Giila ni Lt Col Thomas Pantaleon,tigpamaba sa Lanao del Sur PNP ang target nga si Mastura Disomala,43 anyos nga kanhi brgy kapitan ug naghupot sa local armed group nga konektado sa mga terorista sa lugar.
Apil usab gikasuhan sila Samen Mamasao ug Moca Giambal gumikan sa daghang mga armas ug mga bala ang nakompiskar sa hiniusang operasyon sa PNP.
Si Disomala ang may igsoon usab nga aktibong sakop sa Maute-ISIS group nga kabahin sa unang batch nga milusob sa Marawi City sa tuig 2017.
