CAGAYAN DE ORO CITY – Gidasig sa Commission on Elections ang mga kandidato nga sayo moduso sa ilang sertipiko de kandidatura ug dili na hulaton ang petsa 8 nga gitoohan nga nagdala’g suwerte sa pagsulod nila sa politika.
Kini sa tuyo nga may igo pa nga panahon ang mga kandidato nga mapangita sa ilang mga remedyo kon dunay masugatan nga mga kasilik-an sa COC filing sugod karong adlawa.
Miingon si Misamis Oriental Provincial Election Supervisor Atty. Carlito Ravelo nga dili kontrolado sa mga kandidato ang mga posibilidad nga magka-problema ang ilang COC filing rason nga dili na angay hulaton ang katapusang adlaw alang niini.
Gipasidaan usab niini nga ayha moduso’g COC ilabina sa dagkong mga partido,magpahibalo una aron dili magkatagbo ang magkaribal sa susamang oras nga hayan mo-resulta sa pag-initay sa political supporters.
