CAGAYAN DE ORO CITY – Gihan-ay na sa legal team ni regular COWD board of director chairman Dr. Gerry Caño ang mga kaso nga ipasaka batok sa mga pulis sa COCPO nga daw nagpasagad sa ilang mga trabaho.
Kini human dismayado ang mga empleyado sa ahensiya nga walay gihimo ang COCPO aron pugngan si interim COWD General Manager Fermin Jarales nga giakusahan nga nanglungkab sa mga papeles sa gobierno.
Miingon si Caño nga apil usab sa ilang gipahimuan sa imbestigasyon ang giingong mga pulis gikan sa Misamis Oriental Police Provincial Office nga mikuyog kang Jarales sa pagpangbitbit sa mga dokumento gikan sa COWD sa miaging semana.
Siya miingon nga gawas kang Jarales,kasuhan usab nila didto sa Ombudsman ang pipila ka pulis sa COCPO nga walay gihimo sa maong komosyon.
