CAGAYAN DE ORO CITY – Nakakompiskar ang kapolisan sa klase-klaseng mga sigarilyong ismagol nga laraw ikatag sa mga sindikato sa syudad sa Marawi ug mga sikbit nga kalungsuran sa Lanao del Sur.
Namahayag si Lanao del Sur Police Provincial Police Office Director Col. Robert Daculan nga gikasa sa Marawi City Police Station inabagan sa ubang units ang pagpalig-on sa anti-smuggling operations rason nakompiskar ang mga kontrabando sa sari-sari stores nga nahimutang sa Brgy Panggao Saduc ug Brgy Matampay.
Siya miingon nga tipik sa mga nabawi ang mga sigarilyo nga 30 reams sa San Marino (puti); 17 reams sa San Marino (pula); 33 reams sa Union (pula; 38 reams sa Union (dalandan-puti); 27 reams sa Fort; 23 reams sa Bravo;18 reams sa Cannon menthol ug 2 reams sa Modern.
Gibana-bana nga anaa sa 85-mil pesos ang estimated market values sa mga sigarilyo nga nabawi sa maong operasyon sa miaging semana.
Hisayrang mando ni PNP chief General Rommel Marbil ang pagpuhag sa smuggling operations sa mga sindikato palibot sa nasud rason nga sunod-sunod ang mga nadakpan nga nagpalusot sa mga sigarilyo nga wala moagi sa regulasyon.
