CAGAYAN DE ORO CITY, Philippines – Mipanaw na ang giila nga NBA Hall of Famer Dikembe Mutombo sa edad 58.
Gikumpirmar ni NBA Commissioner Adam Silver ang pagpanaw ni Mutombo gumikan sa brain cancer.
Mitala’g kasaysayan sa NBA si Mutombo human iyang nasakmit ang pasidungog isip greatest shot blockers sa NBA ug pagsilbing defensive player.
Miingon si Silver nga dili malimtan sa liga ang legasiya nga gipaambit sa mipanaw nga NBA Icon.
Misulod sa NBA si Mutombo sa tuig 1991 hangtud 2009 kundiin halos natuyok na niya ang tanan team sa NBA, sama sa pagsilbing defensive player sa Denver Nuggets, Atlanta Hawks, Philadelphia 76ers, New Jersey Nets, New York Knicks ug Houston Rockets.
Gawas sa pagdula sa basketball usa si Mutombo sa mitambang sa gobyerno Democratic Republic of the Congo aron mahaw-as ang mga kabus sa ilang nasud.
Tuig 1997 napatukod niya ang iyang foundation, mga tunghaan, ug mga hospital pinaagi sa charity.
Siya ang pinakaunang Global Ambassadro sa NBA.
Niadtong Oktubre 2022 iyang gianunsiyo ang iyang pagpatambal human nadiagnose sa pagbaton sa brain cancer.
