Gipasalig sa National Bureau of Investigation (NBI) nga walay mahitabong espesyal nga pagtrato kang Senador Jinggoy Estrada kung isilbi na ang iyang arrest warrant kalabot sa mga kasong korapsyon nga iyang giatubang.
Matod ni NBI Director Atty. Melvin Matibag, parehas ra ang ipatuman nga proseso ngadto sa senador ug sa uban pang mga magbabalaod nga adunay warrant gikan sa korte.
Giklaro usab sa direktor nga ang giingong “medical condition” sa magbabalaod, diin gikinahanglan matod pa niini ang operasyon sa tuhod, dili na ubos sa hurisdiksyon sa ilang ahensya kon dili sa korte na nga nagpagawas sa kamanduan.
Mahibaloang, gitun-an karon sa kampo sa senador ang iyang mga opsyon, lakip na ang boluntaryong pagsurender ngadto sa mga otoridad o ang paghulat nga arestuhon siya sa Sandiganbayan.
