CAGAYAN DE ORO CITY – Gitugyan sa lima ka aktibong sakop sa rebeldeng New People’s Army o NPA nga naglihok sa Caraga region ang ilang mga kaugalingon sa kapolisan ug militar sa Misamis Oriental.
Miingon si Police Col. Chuli Jun Caduyac, provincial director sa Misamis Oriental Police Provincial Office nga bitbit sa pagtahan sa maong NPA rebels ang M-14 rifle;shotgun,improvised sub-machine gun ug ubang mugbo nga armas.
Siya miingon nga apil sa mga armas nga gitugyan sa mga rebelde ang mismong gipanag-iya sa retired city police director nga nakabase sa Butuan City.
Dugtong niini,gilayong gisagop ang mga rebelde sa tropa ni 58th IB commander Lt Col. Christian Uy aron ipaubos sa livelihood program nga nakabase sa Claveria ning lalawigan.
Samtang namugos si Caduyac nga wala na’y kapas makahimo’g dinagko nga pagpanghasi ang pipila ka lugas sa NPA sa pipila ka lungsod sa Misamis Oriental.
Kini gumikan sa pagsalikway na sa mismong katawhan ug pag-suporta sa local officials sa whole of the nation approach sa natl govt aron direktang matubag ang mga suliran sa kabaryuhan.
Miingon si Caduyac nga subay sa assessment sa 58th IB,Philippine Army nga igo na lang gapa-duding ang pipila ka aktibong sakop sa NPA apan dili na igo ang katakos aron makapangatake.
Giimbitar ni Caduyac ang mga nabiling rebelde nga biya-an na ang armadong pakigbisog ug mobalik na kagamhanan.
