CAGAYAN DE ORO CITY – Nabawian sa kapolisan sa balor 3.1 milyones pesos nga illegal nga droga ang 87 gikan sa 161 ka indibidwal nga nadakpan sa magkalahing lower unit operations sa Northern Mindanao.
Kini ang sulti ni Police Regional Office 10 Director Brig Gen Jaysen De Guzman subay sa impormasyon gikan sa nagkadaiyang provincial,city police offices ug national support units nga apil sa pakig-giyera batok sa kreminalidad sa rehiyon.
Siya miingon nga anaa sa 76 ka anti-illegal drugs operations ang nalusad aron mabawi ang 460.536 gramos nga gitoohang shabu ug 7.5 gramos usab sa marijuana gikan sa mga dinakpan.
Nabingwit usab sa lower units ang 24 ka tawo nga nalambigit sa illegal nga pasugal ug salapi nga sobra 8-mil pesos.
Nakustodiya na usab sa nagkadaiyang mini-cell ug naghulat sa mando sa mga korte nga isulod sa regular jail facilities ang 47 ka personalidad diin siyam ang most wanted persons.
