Gikondena sa mental health advocate ug consultant nga si Stella Ferrarez, RPM, ang sayop nga pagsabot sa pipila ka katawhan nga ang usa ka tawo nga adunay depression pwede dayon makakuha og PWD ID.
Sa iyang interbyu sa Bombo Radyo, giklaro ni Ferrarez nga ang depression usa ka sakit sa utok o mental nga kahimtangan nga mahimo pang matambalan pinaagi sa hustong terapiya ug tambal.
Gipasabot niya nga dili tanan kaso sa depression awtomatikong pasok sa kwalipikasyon alang sa PWD ID tungod kay adunay klarong giya ug proseso nga gisunod sa mga awtoridad.Sa bahin sa sikolohiya, wala usab mouyon si Ferrarez sa pahayag ni Senador Robinhood Padilla nga walay depression kaniadto.
Matod pa niya, dugay na nga naglungtad ang maong sakit apan natago lamang kini sa una tungod sa stigma ug kakulang sa kahibalo bahin sa mental health.
Nag-awhag si Ferrarez sa mas lawom nga pagsabot sa kahimtangan sa mga adunay depression ug pagwagtang sa sayop nga pagtan-aw batok sa mental health. (James Oliver)
