CAGAYAN DE ORO CITY, Philippines – Subli gipakuratan ni US Presidente Donald Trump ang kalibutan, human siya mismo ang mibakwi sa iyang executive order nga pahamtangan sa 25% nga usbaw sa taripa sa tanan imported products ang nasud sa Mexico.
Miingon si Trump nga nagkasinabot silang duruha ni Mexican President Claudia Sheinbaum nga ihunong una sulod sa usa ka bulan ang pagpahamtang sa taripa.
Kini nga pag-areglo nasabutan sa duha ka nasud aron dili mabutang sa peligro ang ilang tagsa-tagsa ka merkado.
Una niini, mikomitar ang presidente sa Mexico nga tabangan ang National Guards sa Amerika sa pagpuhag sa mga illegal migrants gikan sa ilang nasud, ilabe kadtong mga miyembro sa drug cartel ug nagpalihok sa mga criminal gangs.
Gisaad ni President Sheinbaum nga magdeploy sila’g 10,000 ka mga guwardiya sa mga utlanan aron dili makalahos ang ilang mga sibilyan sa utlanan sa Estadus Unidos.
Gipanigurado ni Trump nga ipahamtang ang 25% nga taripa sa Canada ug Mexico, 10% usbaw sa taripa sa tanan produkto sa China ug laraw niyang pahamtangan sa taripa ang mga musulod nga produkto gikan sa European Union.
