Gipasigarbo ni Department of Education (DepEd) Secretary Sonny Angara sa pagbukas sa Palarong Pambansa 2026 nga mas lapad ug mas inklusibo na ang partisipasyon sa mga kabataan sa managlahing isports.
Labaw sa 11,000 learner-athletes gikan sa lain-laing rehiyon ang nisalmot, ug mibalik usab ang Negros Island Region (NIR) isip lahi nga delegasyon.
Lakip usab ang Philippine Schools Overseas (PSO) ug National Academy of Sports (NAS) nga adunay kaugalingong delegasyon.
Gipaila ni Angara ang bag-ong mga sporting events sama sa Weightlifting, Football para sa Secondary Girls, ug Futsal para sa Elementary Girls isip regular sports, samtang ang Karate, Kickboxing, ug Soft Tennis giapil isip demonstration sports.
Ang Muay Thai ug pipila ka Paragames events sama sa Sitting Volleyball ug Table Tennis gipresentar isip exhibition aron mas inklusibo ang palaro.
Sa iyang mensahe, miingon su Angara nga ang Palarong Pambansa padayon nga nag-ugmad samtang nagpalapad sa damgo sa mga estudyante, ug mas daghan nga espasyo ang ginabuksan para sa partisipasyon ug pag-ila sa lain-laing abilidad sa isports.
Siya mibutyag nga ang kompetisyon kinahanglan patas para sa matag batang atleta.
Ang tema sa Palaro mao ang “Unlocking the Future Through Sports”, nga nagtinguha nga hatagan sa mas daghang oportunidad ang kabataan aron ipakita ang talento ug puy-an ang isports isip kabahin sa holistic youth development, subay sa direktiba ni PresidenteFerdinand Marcos Jr.
Ang grand opening ceremony gipahigayon sa Prosperidad, Agusan del Sur gikan Mayo 24.
Ang palaro dulaon sa 36 sporting venues gikan sa unom ka magkalahing lugar sa Agusan del Sur hangtod 31, uban sa labaw sa 13,247 ka delegado gikan sa 18 rehiyon, PSO, ug NAS.
