CAGAYAN DE ORO CITY – Hingpit nang naduso sa korte ang kasong parricide batok sa 11 ka kabanay nga gilakipan sa duha ka anak ingon man mga apo ug umagad kinsa responsable sa pagsugba-patay sa 75 anyos nga lola diha sa Sitio Palipi,Brgy Baliwagan,Balingasag,Misamis Oriental.
Kini human nakit-an sa provincial prosecutor’s office nga dunay gimbug-aton ug basehan nga giduso nga kaso sa ubang mga anak sa biktima nga angayang manubag sa salaod ang mga responsable.
Gibutyag ni Balingasag Police Station commander Maj Teodoro de Oro nga kabahin sa gikasuhan ang magsoong Nicholas Cabusas ug Jocelyn Cabusas Ercilla ingon man ang sila si Rosalina Cabusas;Rochel Ercilla;Merlinda Cabusas;Jesser Rotola;Reymer Carno;Charlie Cabusas ug ang nagsilbing lider-lider sa kulto nga si Crisanto Ercilla.
Miingon si De Oro nga gihulat na lamang nila ang sugod sa korte nga ibiyahe padulong sa Misamis Oriental Provincial Jail dinhi sa syudad ang nagsilbing parricide case respondents.
Samtang gibasulan sa kadaghanan sa mga paryente nga nagsilbing mga responsable ang wala nila pagbadlong sa kagustuhan ni Cristanto nga isugba hinungdang namatay ang ilang 75 anyos nga apuhan ning lalawigan.
Kini ang pag-angkon sa apo nga si Charlie kinsa kabahin sa gimanduan ni Crisanto nga modayong sa ilang lola nga siTeofila aron isugba sa nagdaliab nga kalayo.
Miingon si Charlie nga maglisod sila’g balibad sa mando ni Crisanto tungod sa hurim-hurim niini hinungdang mapugos pagsunod sa mga gusto ipabuhat kanila.
Gikompirmar sa suspek nga apil siya sa misugba,mipakaligo sa suba ug mipasayaw sa ilang lola ayha kini naluwas sa PNP apan nabugtuan gihapon sa kinabuhi niadtong miaging adlaw.
