CAGAYAN DE ORO CITY – Ilusad na sa napormang Bantay Tubig Movement ang people’s initiative ning syudad karong adlawa.
Miingon si kanhi Konsehal Eric Salcedo nga ang ilang signature campaign ilusad sa Kiosko Kagawasan nga nagtumong sa pag-awhag sa katawhan kung angayan ba wad-an sa bili ug e-repaso ang kontrata nga gisudlan sa Cagayan de Oro Water District o COWD tali sa Cagayan de Oro Bulk Water Incorporaed o COBI nga gipadagan sa Metro Pacific Water ni Manny Pangilinan.
Gawas niini, kwestiyunon usab sa grupo ang tulo ka tuig nga pag-usbaw sa singil sa tubig sa COBI nga walay konsultasyon sa Board o Directors sa water district ug sa naglangkob sa Local Water Utilities Administration o LWUA.
Gusto masayran sa Bantay Tubig kung nganong gitaguan sa COWD ang mga dokumento sa COBI nga nagpamatuod nga dunay pagtugot sa ilang kompanya nga dawaton ang usbaw nga gisitar sa ilang bulk water supplier, nga walay pakisusi o pagkuwestiyon.
Kini ang rason nga wala na maapas sa COWD ang pagbayad sa gisingil nga kapin 400 milyon pesos sa COBI sa water district.
Samtang dili daw mohunong ang Cagayan de Oro Special Task Force for Water Supply and Distribution sa pagsusi ug pagmonitor sa temporary restraining order o TRO nga gipahamtang sa korte batok sa hadla nga putlan sa suply sa panubig ang 1/3 nga ihap sa mga konsumante sa Cagayan de Oro Water District.
Miingon si TF member Konsehal James Judith nga maoy ilang gihulatan ang ruling sa korte karong Mayo 28.
Masaligon ang task force nga ipalugwa sa korte ang permanent injunction aron malugwayan ang gihatag nga 17 ka adlaw nga TRO batok COBI-Metro Pacific Water Masaligon si Judith nga mupabor ang korte sa kagustuhan sa kinabag-an aron mahatagan sa kasulbaran ang suliran sa COWD batok COBI-MetroPac.
