Gi-basura sa Pre-Trial Chamber I sa International Criminal Court (ICC) ang hangyo sa depensa ni kanhi Pangulong Rodrigo Duterte nga tugotan silang mo-apelar sa desisyon bahin sa mga kaso sa “crimes against humanity” nga may kalabotan sa war on drugs.
Ang tolo ka hukom nga sila Presiding Judge Iulia Antoanella Motoc, Judge Reine Adélaïde Sophie Alapini-Gansou, ug Judge María del Socorro Flores Liera mao ang nagdesisyon batok sa depensa.
Giingon sa kampo ni Duterte nga sobra ka lapad ang sakop sa kaso, apan gi-kumpirmar sa Prosecution nga husto ang paglatid sa korte ug klaro ang ebidensiya nga gigamit.
Ang depensa misaway nga kulang ang pagpasabot sa korte, apan giingon sa Prosecution nga nasunod ang proseso ug dili kinahanglan nga isa-isahon ang tanang ebidensiya. Sa Abril 23, gi-kumpirma sa ICC ang mga kaso batok kang Duterte nga naglakip sa murder ug attempted murder isip crimes against humanity gikan pa sa Davao City hangtod sa iyang pagka-presidente.
Gi-basura na usab sa Appeals Chamber ang laing apela sa depensa bahin sa hurisdiksyon sa korte ug gi-deklarar nga moot ang hangyo sa pagpagawas kaniya.
