Nadawat na sa Philippine Olympic Committee (POC) ang opisyal nga kamanduan gikan sa International Volleyball Federation (FIVB) nga nagpahamtang og dinalian nga suspensiyon batok sa Philippine National Volleyball Federation (PNVF).
Sumala ni POC President Abraham ‘Bambol’ Tolentino, posibleng opisyal sab nga suspindihon sa komite ang PNVF atol sa ilang general assembly karong umaabot nga Hunyo tungod kay kinahanglan nilang tumanon ang mga regulasyon sa international federation.
Kini nga silot nagsumikad sa mga kalapasan sa PNVF sa “contractual obligations” sa bag-ohay lang nga Beach Pro Tour event, operational misalignment sa mga organizer, ug balik-balik nga paglapas sa code of ethics samtang nagpadayon pa ang imbestyigasyon.
Mahibaloan nga aron masiguro nga dili maapektuhan ang operasyon ug ang kaayohan sa mga atletang Pilipino, nagpili na ang FIVB og usa ka “ad hoc committee” nga maoy temporaryong modumala sa mga kalihokan sa volleyball sa nasod
