Napakyas ang Philippine Delegation, nga gipanguluhan sa Department of Foreign Affairs (DFA), sa tinguha nga makakuha’g duha ka tuig nga “non-permanent” seat sa United Nationas Security Council (UNSC).
Sa gilusad nga pagbotar kagahapon, midaug ang Foreign Affairs sa Kyrgyzstan, kundiin, nakakuha sila’g 142 affirmative votes, itande sa 49 ka “yes votes” o pagpabor sa Pilipinas.
Gihimo ang pagbotar sa ika-upat ka round, kundiin, dungan sa Kyrgyzstan, nakakuha usab sa non-permanent seat ang mga nasud sa Zimbabwe, Austria, Portugal, ug Trinidad and Tobago.
Sila ang mu-representar isip mga bag-ong non-permanent members nga magsugod sa termino sa Enero 1, 2027.
Ang Zimbabwe maoy muhulip sa Somalia; ang Trinidad and Tobago sa Panama, samtang ang Portugal ug Austria mopuli sa Denmark ug Greece.
Ang Kyrgyzstan maoy muhulip sa ibakante nga bangko sa Pakistan. Ang UNSC usa sa labing gamhanang sanga sa United Nations nga adunay gahum sa pagpagula sa mga resolusyon, pagpakang sa mga economic sanctions, pagdeploy sa peacekeeping forces, ug pag-aprubar sa military action.
Hisayran nga ang mga non-permanent members nga magpabilin hangtod sa 2027 mao ang Bahrain, Colombia, Democratic Republic of the Congo, Latvia, ug Liberia.
Ang lima ka permanenteng miyembro ug dili mahimong hulipan mao ang China, France, Russia, United Kingdom, ug United States.
