CAGAYAN DE ORO CITY – Dili pa luwas ang 2nd level officers sa PNP nga hayan ipaduso usab sa ilang courtesy resignation ngadto sa ilang higher headquarters.
Kini human halos mag-gatos porsiento na nga nakaduso sa maong dokumento ang 3rd level officers o PNP generals ug colonels nga unang gidudahan sa DILG nga nagsumikad ang pipila ka paghatag proteksyon sa illegal drug trade sa nasud.
Miingon si Police Regional Office 10 Director Brig Gen Lawrence Coop nga mag-agad lamang sila sa bag-ong mando gikan sa ilang kadagkuan kabahin sa gipakusog pa nga PNP internal cleansing.
Sa pipila ka anti-drug operations dinhi sa rehiyon,pipila ka pulis ang nadakpan sa pagpahuyot sa ilegal nga droga.
Samtang gikompirmar ni Coop nga dugay nang wala’y presensiya sa mga laboratoryo diin himoon ang drogang shabu dinhi sa Northern Mindanao.
Kini subay sa intelligence monitoring sa PNP ug bisan sa PDEA 10 nga gitahasan sa gobierno pagsumpo sa pagkaylap sa ilegal nga droga sa nasud.
Miingon si Coop nga bisan ang dagkong shabu shipments ang naglisod na’g sulod sa rehiyon ilabina dinhi sa dakbayan gumikan kay anaa na lang sa ginagmay nga gramos ang mabawi sa mga operatiba sa PNP ug PDEA gikan sa mga dinakpan.
Apan giklaro sa heneral nga padayon ang ilang kampanya kontra illegal nga droga dinhi sa rehiyon.
