CAGAYAN DE ORO CITY – Wala na’y gitugtan nga mga pulis nga makabiya sa ilang tagsa-tagsa ka mga trabaho sa rehiyon epektibo sunod semana.
Miingon si Police Regional Office 10 spokesperson Maj Joann Navarro nga subay kini sa kamanduan ni PNP chief Gen Rodolfo Azurin Jr alayon sa paghatag sa hugot nga seguridad sa mga aktibidad sa kapaskuhan ilabina ang pagsugod sa relihiyosong mga kalihukan sa mga simbahang Katolika sama sa simbang gabi ug misa de gallo.
Miingon si Navarro nga mahimo lamang makapalta sa ilang obligasyon ang mga pulis kon emerhensiya kabahin sa panglawas o pamilya ang atubangon niini.
Samtang gisugdan na sa Police Regional Office 10 ang pag-monitor sa tanang lower units kabahin sa pagpatuman sa ‘Ligtas Paskuhan 2022’ palibot sa rehiyon.
Kini sa pagsiguro nga gisunod sa puwersa sa PRO 10 ang mga mekanismo o gabayan sa pagmintinar sa kahusay’g kalinaw sa mga lugar diin nagtapok ang katawhan gumikan sa taliabot nga pagsaulog sa kapaskuhan ug pagsugat sa bag-ong tuig.
Miingon si Navarro nga may mga gipanakaug sila nga puwersa aron ipalig-on ang police visibility sa mga syudad sama sa Cagayan de Oro nga dagsaon sa mga tawo sa holiday season ug ubang aktibidad sulod ning bulana ug unang semana sa Enero 2023.
