CAGAYAN DE ORO CITY – Migamit sa naghinobrang puwersa ang kapolisan nunot sa sugo sa Malakanyang gamit ang warrant of arrest nga dakpon si Pastor Apollo Quiboloy ug pipila ka opisyal sa Kingdom of Jesus Christ Church sa Davao City.
Kini ang pagtan-aw ni CWGG 10 convenor Atty Antonio Soriano kabahin sa kasamtangang kahimtang sa mga sakop ni Quiboloy nga gibantayan sa libuang mga pulis ubos sa Police Regional Office 11.
Miingon si Soriano nga taliwala nga posibleng daghang kopya sa warrant of arrest sa mga kaso ni Quiboloy ang gikuptan sa PNP hinungdang nagdugay sila sulod sa KOJC.
Mitambag usab kini sa legal team sa pastor nga aron mabalik sa normal ang kahimtang sa compound maayo nga moduso sila’g motion to quash sa warrant of arrest nga gibasehan sa kapolisan.
Samtang walay illegal ug igo lang nagsunod ang PNP sa sugo sa ilang kadagkuan aron dakpon na si Quiboloy.
Kini sa tuyo nga matubag na sa pastor ang daghang pasangil nga gipakang batok kaniya nga nasang-at sa pipila ka korte sa nasud.
Miingon si kanhi IBP-Misamis Oriental chapter president Atty Eddie Cuaresma nga ensakto lang ang gihimo sa PNP kay nagbase sila sa sugo sa korte.
Apan nagpadumdom si Cuaresma nga likayan sa mga pulis ang pagpangabuso ug pagpihig sa KOJC members pag-abot sa isyu sa ilang religious practices.
Dugtong niini,gihangad na lang sa mga sakop sa KOJC ngadto sa kahitas-an ang ilang kahimtang nga gitugaw sa libuang mga pulis.
Kini ang pagsaysay sa KOJC member ug media correspondent nga kaanib ni Pastor Apollo Quiboloy nga si Joel dela Cruz sa interbyu sa Bombo Radyo.
Miingon si De la Cruz nga dili sila mga dautang tawo ug nagsunod lamang sa balaod.
Gihinaut niini nga unta patas lang ang kapolisan sa pagtratar kay nabutang na sa peligro ang ilang mga kinabuhi sulod sa compound sa KOJC sukad gilusob sa miaging pang semana.
