Gipamugos ni lead prosecutor Representative Gerville Luistro nga adunay katungod ang mga Pilipino nga personal nga madungog ang tubag ni Vice President Sara Duterte sa mga alegasyon nga gilakip sa impeachment case batok kaniya.
Sumala ni Luistro, gusto sa prosekusyon nga ipatawag si Duterte isip testigo human mapresentar ang tanang upat ka articles of impeachment, isip kabahin sa prinsipyo sa transparency ug accountability nga nakalatid sa Konstitusyon.
Miingon si Luistro nga importante nga madungog mismo sa impeachment court ug sa publiko kung unsaon pagtubag sa bise presidente sa mga alegasyon batok kaniya.
Hugot kining gisupak sa depensa ug miingon nga dili mapugos si Duterte nga motestigo alang sa prosekusyon tungod sa iyang katungod batok sa self-incrimination.
Gumikan niini, gibutyag ni Luistro nga premature pa ang pagsupak sa depensa tungod kay wala pa’y pormal nga mosyon ang prosekusyon alang sa subpoena kang Duterte.
Segun sa korte, hulaton una niini ang pormal nga mosyon sa prosekusyon ug komento sa depensa sa dili pa kini magdesisyon kon mahimo bang ipatawag ang bise presidente isip testigo.
Samtang, giingon usab sa korte nga mahimo pa kini magpatawag sa dugang nga mga testigo kalabot sa isyu sa confidential funds, lakip na sila Colonels Raymund Dante Lachica ug Dennis Nolasco
