Direkta ug walay lipud-lipod nga gipahayag sa Office of the Solicitor General nga dili pwedeng gamiton ni Senador Ronald “Bato” dela Rosa ang extradition rules ug parliamentary immunity aron likayan ang iyang warrant of arrest gikan sa International Criminal Court.
Sumala sa SolGen, lahi ang balaod sa extradition ug sa surrender ubos sa ICC, ug tataw nga gihimo ra kini nga rason sa senador aron dugangan ang iyang mga legal nga palusot.
Gawas niini, gipasabot sa maong opisina nga ang parliamentary immunity magamit lang sa mga kaso nga dili molapas sa unom ka tuig nga pagkabilanggo layo ra kaayo sa seryosong kasong crimes against humanity nga nag-atubang og tibuok kinabuhi nga pagkabilanggo.
Gibutyag sab sa gobyerno nga gawasnon ug wala may nagpugong kang Dela Rosa sa pagtrabaho ug pagbotar sa Senado sa miaging semana, hinungdan nga wala kini katungod nga mangayo og injunctive writ o panalipod gikan sa Korte Suprema.
Gidugang pa sa SolGen nga kung magpadayon ang senador sa paglikay-likay sa mga awtoridad, isipon kining usa ka pugante nga walay katungod nga mangayo og tabang sa atong lokal nga korte.
Sa pagkakaron, gihatagan na sa Korte Suprema ang kampo ni Dela Rosa og 72 ka oras aron tubagon kining pormal nga komento sa gobyerno batok sa iyang mga hangyo. (jane abulag)
