Gibutyag ni Dept of Interior Secretary Jonvic Remulla nga bisan pa nga giila ni Presidente Ferdinand Marcos Jr. nga iyang igsoon ang iyang ig-agaw nga si Kanhi House Speaker Martin Romualdez, apan wala kini nagmando sa mga otoridad kung unsaon kini pagtratar o wala kini gihatagan og special treatment human sa iyang pagkasikop.
Matud ni Remulla, dili kini sayon para kang Presidente Marcos tungod kay giisip na niini nga igsoon ang iyang suod nga ig-agaw nga si Romualdez, apan wala kini magpagawas og mando o bisan unsang instruksyon ngadto sa otoridad para kang Romualdez.
Miingon si Remulla nga andam niyang pamatud-an ang iyang gipahayag pinaagi sa pagpakita sa iyang phone log ngadto sa publiko nga wala sila’y panag-istoryahanay sa presidente kalabot sa maong hisgutanan.
Sa kasamtangan, nakaconfine pa gihapon ubos sa police arrest si Romualdez sa Cardinal Santos Medical Center nga nahimutang sa San Juan City ug miingon usab si Remulla nga ibalhin dayon nila kini sa PNP General Hospital sa Kampo Krame sa higayon nga anaa na kini sa luwas nga kahimtang. (Raniel Mahunyag)
