Padayon gihapon ang search, rescue, ug retrieval operations sa nahugno nga siyam ka andana nga building didto sa Angeles City, Pampanga, bisan paman ug hapit na usa ka semana ang milabay human sa maong trahedya.
Sumala ni Fire Superintendent Maria Lea Sahili, naggamit na sila karon og nagkalain-laing pamaagi aron masusi og maayo ang mga naguba nga istruktura sa tinguha nga duna pa silay maluwas nga kinabuhi.
Sa pagkakaron, nagpabilin sa unom ang kumpirmadong patay, samtang anaa pa sa katorse ka tawo ang padayon nga gipangita sa maong dapit.
Gikataho usab ang pagkakaplag sa mga motorsiklo, cashbox, ug payong, hinungdan nga gidudahang naapil sa pagkahugno ang nag-unang nareport nga mag-amang naglakat ug push cart duol sa maong bilding.
Bisan pa man ug adunay na-detect nga lihok ang K9 unit sa Philippine Coast Guard sa ilalom sa mga guba, giklaro sa BFP nga dili kini awtomatikong nagpasabot nga adunay buhi pa nga tawo sa sulod. (jane abulag)
