Gihangyo ni Senador Raffy Tulfo nga padalion ang pagpasaka og kaso batok sa kapitan ug uban pang crew sa MV June Aster nga nasunog ug miresulta sa pagkamatay sa 77 ka pasahero.
Gikumpirma ni Philippine Coast Guard (PCG) Commodore Geronimo Tuvilla atol sa pagdungog nga lakip sa mga posibleng ipasaka ang kasong reckless imprudence resulting in multiple homicide and serious physical injuries.
Matud ni Tuvilla, gihulat na lamang nila ang mga dokumentong mosuporta sa pagpasaka gikan sa Bureau of Fire Protection (BFP) ug nakaandam ang mga gikinahanglan alang sa pagpasaka og kaso.
Gipamugos usab sa Senador nga kinahanglang padalion ang maong proseso tungod kay gilaay ug nangutana na ang pamilya sa mga biktima kung ngano dugay ang pagpasaka og kaso ug gihangyo niini nga mapasaka ang kaso sa sulod lamang sa usa ka semana o bag-o mahuman ning bulan sa Oktubre. (raniel mahunyag)
