Gihimakak ug lig-ong gitubag ni Senator Vicente C. Sotto III ang mga pasangil sa pipila ka ex-Marines nga naglambigit kaniya sa usa ka flood control scandal, diin gikatahong nakadawat kuno ang senador og usa ka maleta nga puno sa kwarta.
Matod sa senador, walay kamatuoran ang maong mga akusasyon ug angay lang kining ilabay sa basurahan tungod kay usa kini ka “bogus” ug ilegal nga hearing.
Giklaro ni Sotto nga wala siya nagserbisyo sa gobyerno niadtong tuig 2024, hinungdan nga imposibleng nahitabo ang giingong anomalya o ang pagdawat sa maong suborno sa maong panahon.
Gikataw-an lang usab sa senador ang pasangil nga may misulod kuno nga limousine sa iyang edipisyo aron ihatod ang maong kwarta.
Matod niya, wala siyay kaugalingong building gawas sa usa ka PR office dapit sa Baclaran, ug imposible nga makasulod ang maong dako nga sakyanan sa basement niini tungod kay dili kini maigo.
Dugang pa ni Sotto, sa tanang gihisgutan nga iyang kauban, usa lang ang iyang kaila nga ginganlag Mark nga iyang kanhi Executive Assistant, apan kini dugay na nga mitaliwan niadtong tuig 2015.
