(Update) CAGAYAN DE ORO CITY – Nasang-atan sa kasong pagsupak sa Dangerous Drugs Act of 2002 ang city hall employee nga nagsilbing staff worker ni Kag James Judith kinsa unang nasikop sa giingong pagbaligya sa ilegal nga droga sa syudad.
Miingon si Carmen Police Station commander Maj Mario Mantala Jr nga dismyado sila nga mismo kauban nila sa trabaho sa gobierno ang ilang nadakpan gumikan sa maong ilegal nga kalihukan.
Gitumbok ni Mantala nga nagsilbing suspected shabu user ug pusher si Revel Guangco ug dugay nang nabaniug sa intelligence community sa iyang kalihukan hinungdang gikasa nila ang drug buy bust operation sa Brgy Macabalan ning syudad sa miaging semana.
Una nang gibarugan ni Judith nga dili makalaum sa tabang ang maong suspek kay klaro nga supak sa balaod ang giatubang niini nga pasangil.
Gipanganti sa opisyal nga kutob sa masulod sa ilang target operation,wala sila’y pilion nga dakpon bisan kon kauban pa nila kini sa trabaho.
