CAGAYAN DE ORO CITY – Patay ang upat ka tawo samtang usa ang naangol sa panagbangga sa trailer truck ug starex van diha sa national highway sa Baliwagan, Balingasag, Misamis Oriental kaganinang kadlawon.
Naila ang mga namatay nga sila si Bertley Jerome Esperat, Lucille Rosete Cardinales, pulos taga Brgy. Bulua, Cagayan de Oro, Estela Dalangin ug Erika Manangkin, pulos taga lungsod sa Medina.
Samtang naangol si Miriam Esperat kinsa gitambalan sa Balingasag District Hospital.
Sa pakighinabi sa Bombo Radyo, gibutyag ni Police Maj. Teodoro de Oro, hepe sa Balingasag Police Station nga subay sa ilang imbestigasyon kusog ang dagan sa trak ug van sa dihang sila nagbangga sa kurbada nga bahin sa national highway.
Tungod sa kusog nga impact sa bangga, naipit ang mga sakay sa van nga miresulta sa pagkamatay sa upat ka biktima apil ang driver nga si Esperat.
Gidaro pa sa trak ang usa ka panimalay apan walay mga tawong na-angin.
Anaa karon sa kustodiya sa kapolisan ang trak driver nga si Roy Decio nga taga Butuan City.
