(Update) CAGAYAN DE ORO CITY – Gimanduan ni City Mayor Rolando ‘Klarex’ Uy si COCPO City Police Director Col Aaron Mandia nga hinagbuon ang tanang gangs nga naglihok dinhi sa syudad unya sa hapon.
Wala matago sa mayor ang makalolooy nga kamatayon sa batan-ong sakop sa Kaibigan Lang Po nga si Nathaniel Ebalang nga gitagabanga’g kulata ug dunggab gumikan sa karambola sa pikas grupo nga Soy Shit Dem o SSD atubangan sa daghang tawo sa Corrales Avenue sa dakbayan sa miaging adlaw’ng Domingo sa hapon.
Gibutyag ni Cogon Police Station commander Police Maj Julius Saluta nga tuyo niini nga matumbok ang gangs nga naglihok sa dakbayan ug kinsa ang mga milangkob.
Una nang nagbahad ang mayor nga bungkagon ang tanang gangs sa kabatan-unan kon dili sila mohunong sa paghimo’g kasamot ug kagubot dinhi sa syudad.
Una ang giakusar sa suspek nga gipareglahan sila sa grupo ni Ebalang apan sukwahi usab ang bersyon sa Kaibigan Lang Po gang kay ilang gipamugos nga sila ang gibirahan hinungdang nagka-ginukdanay gikan sa Gaisano viccinity padulong sa Centrio Ayala Mall sa miaging Domingo sa hapon.
Samtang kasuhan sa kapolisan sa murder ang prime suspect ug ang laing unom ka sakop sa gang nga responsable pagdunggab-patay sa 14 anyos nga batan-on ning syudad.
Nadakpan ang suspek sa gihimong follow up operations samtang nagtagu-tago sa ilang pinuy-anan sa Galaxy,Brgy Gusa ning dakbayan.
Miingon si Saluta nga nabawi sa posisyon ni Lumamba ang kutsilyo nga gigamit niya pagdunggab sa kang Ebalang nga taga-Ramonal Village,Brgy Camaman-an.
Giklaro usab ni Saluta nga dili maapil ang founder sa SSD gang ug ubang mga sakop niini kay walay ebedensiya nga makatudlo kanila nga nalambigit sa kremin.
Dugtong niini,walay personal nga atraso ni Lumamba si Ebalang diha sa Corrales Avenue ning syudad.
Kini ang katin-awan sa suspek pipila ka oras gikan sa iyang pagkasikop sa mga operatiba sa mga pulis sa mismong pinuy-anan niini sa Brgy Gusa ning dakbayan.
Miingon si Lumamba nga pag-responde lamang ang iyang gihimo kay nakit-an niini nga na-dehado ang pipila sa ilang grupo hinungdang si Ebalang ang nasapon ug nahinaykan.
Siya miingon nga nakahukom kini magpadakop aron makapangayo’g pasaylo ug atubangon ang salaod nga nahimo ngadto sa biktima.
